2025-nji ýylyň 6-njy maýynda Türkmenistanyň Daşary işler ministriniň orunbasary Mähri Bäşimowa bilen BMG-niň Ilatly nokatlar boýunça maksatnamasynyň (BMG-Habitat) halkara bilermenlerinden düzülen baha beriş missiýasynyň agzalarynyň arasynda duşuşyk geçirildi.
Häzirki wagtda hereket edýän Türkmenistanyň Hökümeti bilen BMG-Habitatyň arasynda özara düşünişmek hakynda Ähtnamanyň çäklerinde ikitaraplaýyn hyzmatdaşlygy giňeltmek gepleşikleriň esasy mowzugy boldy.
Duşuşygyň barşynda soňky ýyllarda Türkmenistan bilen BMG-Habitatyň arasyndaky gatnaşyklaryň ep-esli işjeňleşendigi nygtaldy. Hyzmatdaşlyk dürli ugurlarda milli şähergurluşyk syýasatynyň ösmegine, şol sanda şäher we oba ilatly ýerlerde kadalaşdyrmaga, meýilleşdirmäge, taslamalaşdyrmaga we daşky gurşawy goramaga itergi berýär.
Taraplar 2030-njy ýyla çenli döwür üçin durnukly ösüş ulgamynda Gün tertibiniň çäklerinde ýurduň borçnamalaryna kybapdaş gelýän we DÖM 11-iň durmuşa geçirilmegi üçin esas bolup hyzmat edýän milli maksatnamalary kabul etmegiň we durmuşa geçirmegiň ähmiýetini bellediler.
Konstruktiw ýagdaýda geçen gepleşikleriň ahyrynda söhbetdeşler hyzmatdaşlygy has-da pugtalandyrmaga ygrarlydyklaryny we ony täze mazmun bilen baýlaşdyrmaga bolan meýillerini tassykladylar.
